ເມື່ອບໍ່ດົນມານີ້ີ້ ທີ່ບ້ານຊຳເກດ ເມືອງສີໂຄດຕະບອງ ນະຄອນຫລວງວຽງຈັນ ໄດ້ມີພິທີເປີດ ສະໜາມກິລາງົວຊົນງົວ ລາວສຳພັນ ນາໆຊາດ ຢ່າງເປັນທາງການ ເພື່ອສະເຫລີມສະຫລອງ ບຸນກິນຈຽງ (ນໍເປ້ເຈົາ) ປະຈຳປີ 2016-2017 ທັງເປັນການສົ່ງເສີມ ປະຊາຊົນລາວ ບັນດາເຜົ່າຫັນມາ ລ້ຽງງົວຊົນ ກໍ່ຄືລ້ຽງງົວ ເປັນສິນຄ້າ ໃຫ້ຫລາຍຂຶ້ນ ໂດຍການເຂົ້າຮ່ວມ ຂອງທ່ານ ຈະເລີນ ເຢຍປາວເຮີ, ກຳມະການສູນກາງພັກ ລັດຖະມົນຕີ ປະຈຳສຳນັກງານ ນາຍົກລັດຖະມົນຕີ, ທ່ານ ລີຕູ້ ບົວປາວ ຮອງ ລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ເຍ່ຍເກີຢ່າງ ໜໍຈໍຈົ່ງຕົວ ຮອງປະທານສູນກາງ ແນວລາວສ້າງຊາດ, ພ້ອມຄະນະປະທານ ສະໜາມກິລາງົວຊົນງົວ, ແຂກຖືກເຊີນ ແລະ ພໍ່ແມ່ປະຊາຊົນ ເຂົ້າຮ່ວມຫລາຍພັນຄົນ.

capture2

ທ່ານ ວົງພອນ ຈົ່ງເຢ້ໜໍຈໍຈົງຕົວ ປະທານສະມາຄົມ ງົວຊົນງົວລາວ ສຳພັນນາໆຊາດ ໄດ້ກ່າວວ່າ: ການກໍ່ສ້າງສະໜາມ ກິລາງົວຊົນແຫ່ງ ນີ້ຂຶ້ນ ກໍ່ເພື່ອເປັນການສົ່ງເສີມ ໃຫ້ປະຊາຊົນລາວ ບັນດາເຜົ່າລ້ຽງສັດ ເພື່ອການແຂ່ງຂັນ, ເພື່ອເປັນເສດຖະກິດ ໂດຍສະເພາະ ແມ່ນງົວຊົນໃຫ້ຫລາຍ ຂຶ້ນ ເຊິ່ງນອກຈາກລ້ຽງ ແຂ່ງຂັນກິລາແລ້ວ ຍັງຂາຍເປັນສິນຄ້າ ໄດ້ເພາະການລ້ຽງງົວຊົນ ແມ່ນໄດ້ລາຄາສູງ ກວ່າການລ້ຽງງົວທົ່ວໄປ. ນອກຈາກນີ້ ຍັງເປັນການສ້າງ ກິດຈະກຳ ເບິກບານມ່ວນຊື່ນ, ສ້າງຄວາມສາມັກຄີລະຫວ່າງຊົນເຜົ່າ ດ້ວຍກິລາງົວຊົນ, ຄວາມສາມັກຄີລະຫວ່າງແຂກທີ່ມາທ່ຽວ ມີຄວາມເບິກບານ ມ່ວນຊື່ນເນື່ອງໃນໂອກາດບຸນ ກິນຈຽງ ກໍ່ຄືວັນສຳຄັນທົ່ວໄປ.

ສຳລັບບຸນກິນຈຽງປີນີ້ ຢູ່ບ້ານ ຊຳເກດ ນັບວ່າເປັນປີພິເສດໜຶ່ງ ທີ່ມີຫລາຍໆກິດຈະກຳ ເຊິ່ງນອກຈາກ ເປີດສະໜາມກິລາ ງົວຊົນງົວລາວ ສຳພັນນາໆຊາດ ແລະ ຊົມງົວຊົນງົວແລ້ວ, ຍັງມີກິດຈະກຳ ປະກວດນາງສາວງາມເຜົ່າມົ້ງ, ນັກຮ້ອງສຽງດີ, ໂຍນໝາກຄອນ ຂອງບ່າວ-ສາວ, ກິລາບານເຕະ, ກະຕໍ້, ການວາງສະແດງ ສິນຄ້າປະເພດຕ່າງໆ ເພື່ອໃຫ້ປະຊາຊົນລາວ ບັນດາເຜົ່າໄດ້ທ່ຽວຊົມ ແລະ ເບິກບານມ່ວນຊື່ນ ທັງເປັນການສົ່ງເສີມ ການທ່ອງທ່ຽວ ແລະ ດຶງດູດນັກທ່ອງທ່ຽວ ຕ່າງປະເທດເຂົ້າມາທ່ອງທ່ຽວ ຢູ່ນະຄອນຫລວງວຽງຈັນ ກໍ່ຄື ສປປ ລາວ ນັບມື້ເພີ່ມຂຶ້ນ ປະກອບສ່ວນຫາແຫລ່ງທຶນ ເຂົ້າໃນການສ້າງສາ ພັດທະນາປະເທດຊາດ ໃຫ້ຈະເລີນກ້າວໜ້າ ຂຶ້ນເທື່ອລະກ້າວ.

 

ຂອບໃຈແຫຼ່ງຂ່າວຈາກ: KPL

ຖ້າຍັງບໍ່ໄດ້ Like ເພຈ໌ເຟສບຸກ “devcrown.com ຄວາມຮູ້ທັນສະໄໝ“, ກະລຸນາ Like ໃຫ້ແນ່ເດີ້, ຊິບໍ່ໄດ້ພາດຂໍ້ມູນຂ່າວສານ, ຄວາມຮູ້ທີ່ດີດີ.

 

Facebook Comment

LEAVE A REPLY