ລັດຖະບານ ໄທ ຈະເລັ່ງເຈລະຈາເພື່ອຕົກລົງ ກ່ຽວກັບ ການເຊື່ອມຕໍ່ທາງລົດໄຟກັບ ລາວ ແລະ ຈີນ ໃຫ້ໄດ້ໃນມໍ່ໆນີ້ ໂດຍຖືເປັນພາກສ່ວນທີ່ສຳຄັນໃນແຜນການໜຶ່ງແລວທາງ-ໜຶ່ງ ເສັ້ນທາງຂອງ ຈີນ.

ທ່ານ ສົມຄິດ ຈາຕຸສີພິທັກ ຮອງນາຍົກລັດຖະມົນຕີຂອງ ໄທ ຖະແຫຼງຢືນຢັນວ່າ ການສ້າງຕັ້ງເຂດເສດຖະກິດ ພິເສດ ພາກຕາເວັນອອກ (Easter Economic Corridor-EEC) ຂອງປະເທດ ໄທ ມີເປົ້າໝາຍທີ່ຈະພັດທະນາໃຫ້ເປັນເຂດເສດຖະກິດທີ່ສຳຄັນຂອງ ອາຊຽນເພື່ອເຊື່ອມໂຍງກັບແຜນການ ໜຶ່ງແລວທາງ-ໜຶ່ງເສັ້ນທາງ (One Belt-One Road) ຫຼື ເສັ້ນທາງສາຍໄໝແຫ່ງສັດຕະວັດທີ 21 ຂອງລັດຖະບານ ຈີນ.

ໂດຍສະເພາະແມ່ນການເຊື່ອມຕໍ່ທາງລົດໄຟລະຫວ່າງ ໄທ ກັບ ຈີນ ແລະ ບັນດາປະເທດທີ່ຢູ່ໃນເຂດ ລຸ່ມແມ່ນໍ້າຂອງດ້ວຍກັນ ຄື ກຳປູເຈຍ, ລາວ, ມຽນມາ ແລະ ຫວຽດນາມ (CLMV) ນັ້ນຖືເປັນເປົ້າໝາຍສຳຄັນ ທີ່ລັດຖະບານ ໄທ ຈະເລັ່ງເຈລະຈາເພື່ອຈັດທຳຂໍ້ຕົກລົງຮ່ວມກັນໃຫ້ໄດ້ໃນມໍ່ໆນີ້ ທັງຍັງຈະລວມເຖິງການເຊື່ອມຕໍ່ ລະບົບເທັກໂນໂລຊີດ້ານຂໍ້ມູນຂ່າວສານ ລະຫວ່າງກັນອີກດ້ວຍ ດັ່ງທີ່ທ່ານ ສົມຄິດ ໄດ້ໃຫ້ການຢືນຢັນວ່າ

“ເຮົາພະຍາຍາມທີ່ຈະໃຫ້ EEC ສາມາດເຊື່ອມໂຍງເຂົ້າກັບ One Belt-One Road ຂອງ ຈີນ ໂດຍໃຫ້ສາມາດເຊື່ອມໂຍງຜ່ານເສັ້ນທາງລົດໄຟ ໄທ-ຈີນ ຊຶ່ງເຮົາພະຍາຍາມເລັ່ງໃຫ້ດຳເນີນການໄດ້ໄວໆ ແລະ ທີ່ສຳຄັນທີ່ສຸດຄືການເຊື່ອມຕໍ່ລະຫວ່າງ OneBelt-One Road ກັບອະນຸຸພູມີພາກ CLMV ນີ້ທີ່ເຊື່ອມໂຍງທັງເລື່ອງ ຂອງ Hard Infrastructure ແລະ Soft Infrastructure ກໍຄືເລື່ອງຂອງອິນເຕີແນັດໃນອະນາ
ຄົດຂ້າງໜ້າ.”

ໂດຍການເຊື່ອມຕໍ່ທາງລົດໄຟ ໄທ-ຈີນ ດັ່ງກ່າວນີ້ ກໍຄືເສັ້ນທາງລົດໄຟທີ່ມີ ສປປ ລາວ ເປັນສູນກາງການເຊື່ອມຕໍ່ ນັ້ນເອງ ຊຶ່ງການກໍ່ສ້າງທາງລົດໄຟໃນ ລາວ ເພື່ອເຊື່ອມຕໍ່ກັບ ຈີນ ແລະ ໄທ ມີກຳນົດການກໍ່ສ້າງໃຫ້ແລ້ວສຳເລັດ ພາຍໃນ 60 ເດືອນນັບຈາກພິທີເປີດ ການກໍ່ສ້າງທີ່ມີຂຶ້ນຢ່າງເປັນທາງການ ເມື່ອວັນທີ 25 ທັນວາ 2016 ທີຜ່ານມາ ຢູ່ທີ່ ແຂວງຫຼວງພະບາງ ໂດຍທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍເອກອັກຄະລັດຖະທູດ ຈີນ ປະຈຳນະຄອນຫຼວງວຽງຈັນ ແລະ ຄະນະຜູ້ຕາງໜ້າຂອງທາງການທັງ 2 ປະເທດໄດ້ເຂົ້າຮ່ວມເປັນສັກຂີພິຍານ ໃນພິທີດັ່ງກ່າວ.

ທັງນີ້ໂດຍຄະນະບໍລິຫານບໍລິສັດຮ່ວມທຶນທາງລົດໄຟ ລາວ-ຈີນ ໄດ້ຕົກລົງຄັດເລືອກ 11 ບໍລິສັດ ຈີນ ໃຫ້ເປັນພາກສ່ວນຮັບຜິດຊອບໂຄງການ ໂດຍປະກອບດ້ວຍບໍລິສັດກໍ່ສ້າງ ທາງລົດໄຟເລກ 5, ບໍລິສັດກໍ່ສ້າງ ທາງລົດໄຟສາກົນ, ບໍລິສັດກໍ່ສ້າງທາງລົດໄຟເລກ 8, ບໍລິສັດ SINO-HYDRO, ບໍລິສັດກໍ່ສ້າງໄຟຟ້າ ຈີນ, ບໍລິສັດທີ່ປຶກສາທາງດ້ານວິສະວະກຳກໍ່ສ້າງ ທຽນສິນ, ບໍລິສັດທີ່ປຶກສາ CIECC, ບໍລິສັດທີ່ປຶກສາທາງດ້ານວິສະວະກຳ ສາງເຊິງ-ເຫີໜານ, ບໍລິສັດທີ່ປຶກສາກວດສອບທາງດ້ານເຕັກນິກ ອູ່ຮັ່ນ-ເຖີ່ຍເຈິ້ງ, ສະຖາບັນທີ່ປຶກສາກວດສອບ ໃນດ້ານເຕັກນິກລົດໄຟ ແລະ ບໍລິສັດທີ່ປຶກສາ ຊົງເຖີ່ຍ-ສີຊຸ່ນຈຳກັດ.

ທັງນີ້ຄາດໝາຍວ່າຈະຕ້ອງນຳໃຊ້ແຮງງານ ມີປະສົບການໃນການກໍ່ສ້າງທາງລົດໄຟຈາກຈີນ 10,000 ກວ່າຄົນ ໂດຍສະເພາະແມ່ນແຂວງອຸດົມໄຊ ຈະຕ້ອງໄດ້ນຳໃຊ້ແຮງງານຈາກ ຈີນ ເຖິງ 5,000 ກວ່າຄົນ ເນື່ອງຈາກທາງລົດໄຟຈະຕ້ອງຜ່ານແຂວງອຸດົມໄຊ ເປັນໄລຍະທາງລວມ 126.6 ກິໂລແມັດ ຄິດເປັນ 1 ໃນ 3 ຂອງເສັ້ນທາງທັງໝົດ ທັງຍັງຈະຕ້ອງກໍ່ສ້າງສະພານ ແລະ ເຈາະອຸໂມງທີ່ຄິດເປັນ 40 ເປີເຊັນຂອງທາງລົດໄຟ ໃນແຂວງດັ່ງກ່າວນີ້ອີກດ້ວຍ.

ໂຄງການກໍ່ສ້າງທາງລົດໄຟໃນ ລາວ ເປັນການຮ່ວມທຶນ ລາວ-ຈີນ ໃນສັດສ່ວນ 30 ເປີເຊັນ ຕໍ່ 70 ເປີເຊັນຂອງ ມູນຄ່າ ລົງທຶນເກືອບ 6,000 ລ້ານໂດລາ ທີ່ກູ້ຢືມຈາກສະຖາບັນການເງິນຂອງ ຈີນ ໂດຍທາງລົດໄຟໃນ ລາວ ຈະມີໄລຍະທາງ 417 ກິໂລແມັດຈາກບໍ່ເຕັນ ແຂວງຫຼວງນໍ້າທາ ຜ່ານແຂວງອຸດົມໄຊ-ຫຼວງພະບາງ-ຊຽງຂວາງ-ວັງວຽງ ແລະ ນະຄອນຫຼວງວຽງຈັນ ດ້ວຍລາງຂະໜາດກວ້າງ 1.435 ແມັດ ໂດຍຂະບວນລົດທີ່ຂົນສົ່ງ
ສິນຄ້າ ແລະ ຂະນວນລົດໂດຍສານແລ່ນດ້ວຍຄວາມໄວ 120 ແລະ 160 ກິໂລແມັດຕໍ່ຊົ່ວໂມງຕາມລຳດັບ.

ແຫຼ່ງຂ່າວຈາກ: VOAlaos, ຮຽບຮຽງ: devcrown.com ຄວາມຮູ້ທັນສະໄໝ

ຝາກ Like, share, comment ເພື່ອສະໜັບສະໜູນພວກເຮົາ ແລະ ຖ້າຍັງບໍ່ໄດ້ Like ເພຈ໌ເຟສບຸກ “devcrown.com ຄວາມຮູ້ທັນສະໄໝ”, ກະລຸນາ Like ໃຫ້ແນ່ເດີ້, ຊິບໍ່ໄດ້ພາດຄວາມຮູ້ທີ່ດີດີ.

Facebook Comment
SHARE