ສປປ ລາວ ເປັນປະເທດທີ່ີອຸດົມສົມບູນໄປດ້ວຍຊັບໃນດິນສິນໃນນ້ຳ ແລະມີພູມສັນຖານ ໂດຍສະເພາະແມ່ນມີຫ້ວຍນ້ຳລຳເຊຫຼາຍສາຍ ທີ່ເໝາະສົມແກ່ການພັດທະນາ ພະລັງງານສະອາດ ໜຶ່ງໃນນັ້ນວຽງຈັນກໍເປັນອີກແຂວງໜຶ່ງ ທີ່ມີເງື່ອນໄຂຕໍ່ການພັດທະນາດັ່ງກ່າວ ໂດຍເວລານີ້ກຳລັງມີການກໍ່ສ້າງ ແລະສຶກສາສຳຫຼວດການສ້າງເຂື່ອນໄຟຟ້າເກືອບ 20 ແຫ່ງ ລວມມູນຄ່າປະມານ 9,72 ພັນຕື້ກີບ ຂະນະທີ່ປະຈຸບັນຢູ່ແຂວງດັ່ງກ່າວ ມີເຂື່ອນທີ່ໄດ້ເຄື່ອງຜະລິດໄຟແລ້ວ 5 ແຫ່ງ.

ເມື່ອບໍ່ດົນຜ່ານມານີ້ທ່ານ ຮຸ່ງທອງ ຄຳລາສີ ຫົວໜ້າຂະແໜງທຸລະກິດພະລັງງານພະແນກພະລັງງານ ແລະບໍ່ແຮ່ແຂວງວຽງຈັນ ໄດ້ເປີດເຜີຍຕໍ່ທີມຂ່າວໜັງສືພິມເສດຖະກິດ-ສັງຄົມຮູ້ວ່າ: ປະຈຸບັນຢູ່ແຂວງວຽງຈັນ ໄດ້ດຳເນີນການກໍ່ສ້າງເຂື່ອນໄຟຟ້າ ພະລັງງານນ້ຳຈຳນວນ 4 ແຫ່ງໃນນັ້ນມີ ເຂື່ອນຂະໜາດໃຫຍ່ສູນກາງອະນຸຍາດ 1 ແຫ່ງຄື ເຂື່ອນໄຟຟ້ານ້ຳລີກ 1 ມີກຳລັງຕິດຕັ້ງ 64,7 ເມກາວັດສ່ວນທີ່ເຫຼືອແມ່ນເຂື່ອນ ນ້ອຍເປັນຕົ້ນແມ່ນ ເຂື່ອນນ້ຳສະມ່ອຍ 5 ເມກາວັດ, ເຂື່ອນນ້ຳມອນ 6 ເມກາວັດ ແລະໂຄງການກໍ່ສ້າງເຂື່ອນໄຟຟ້ານ້ຳໄພມີກຳ ລັງການຕິດຕັ້ງ 2,5 ເມກາວັດ.

ແນວໃດກໍດີ ນອກຈາກໂຄງການທີ່ໄດ້ດຳເນີນການກໍ່ສ້າງນັ້ນ ປະຈຸບັນຍັງມີໂຄງ ການຢູ່ໃນຂັ້ນຕອນເຊັນບົດບັນທຶກ ຄວາມເຂົ້າໃຈ ແລະຢູ່ໃນຂັ້ນຕອນດຳເນີນເອກະສານອີກຈຳນວນ 15 ໂຄງການ ໃນນັ້ນມີ ໂຄງການຂະໜາດໃຫຍ່ ທີ່ສູນກາງອະນຸຍາດ 2 ໂຄງການຄື ໂຄງການໄຟຟ້ານ້ຳຂອງຊະນະຄາມ ມີກຳລັງການຕິດຕັ້ງ 660 ເມກາວັດ, ໂຄງການເຂື່ອນໄຟຟ້ານ້ຳເຟືອງເມືອງແມດ ມີກຳລັງການຕິດຕັ້ງ 60 ເມກາວັດເຫຼືອຈາກນັ້ນ 13 ໂຄງການທີ່ແຂວງອະນຸຍາດແມ່ນໂຄງການຂະໜາດນ້ອຍ ຊຶ່ງຫາກວ່າໄດ້ຮັບການພັດທະນາ ຈະລວມມີກຳລັງຕິດຕັ້ງ ທັງໝົດ 974,3 ເມກາວັດ.

ທ່ານ ຮຸ່ງທອງ ຄຳລາສີ ໃຫ້ຮູ້ຕື່ມອີກວ່າ: ສັງລວມເຂື່ອນທີ່ສູນກາງອະນຸຍາດ ແລະແຂວງອະນຸຍາດ ທີ່ກຳລັງດຳເນີນການກໍ່ສ້າງ ແລະພວມສຶກສາສຳຫຼວດທົ່ວແຂວງວຽງຈັນ ແມ່ນມີທັງໝົດ 19 ໂຄງການ ມີມູນຄ່າການລົງທຶນທັງໝົດ 1.215,9 ລ້ານໂດລາສະຫະລັດ ຫຼື ປະມານ 9,72 ພັນຕື້ກີບ ຂະນະທີ່ປະຈຸບັນທົ່ວແຂວງມີເຂື່ອນທີ່ໄດ້ຜະລິດໄຟຟ້າແລ້ວຈຳນວນ 5 ແຫ່ງ ຄືເຂື່ອນນ້ຳງື່ມ 1, ນ້ຳລີກ1/2, ນ້ຳມັງ 3, ນ້ຳສະນາ ແລະເຂື່ອນໄຟຟ້ານ້ຳຊອງ ໂດຍລວມມີກຳລັງການຕິດຕັ້ງທັງໝົດ 315 ເມກາວັດ ຊຶ່ງນັບວ່າໄດ້ປະກອບສ່ວນສຳຄັນໃນການແກ້ໄຂຄວາມທຸກຍາກຂອງປະຊາຊົນກໍຄື ຊຸກຍູ້ສົ່ງເສີມ ນະໂຍບາຍຂອງລັດຖະບານໃນການເປັນໝໍ້ໄຟອາຊຽນໄດ້ເປັນຮູບປະທຳຫຼາຍຂຶ້ນໃນອະນາຄົດ.

ແຫຼ່ງຂ່າວຈາກ: ໜັງສືພິມເສດຖະກິດ-ສັງຄົມ, ຮຽບຮຽງ: devcrown.com ຄວາມຮູ້ທັນສະໄໝ

ຝາກ Like, share, comment ເພື່ອສະໜັບສະໜູນພວກເຮົາ ແລະ ຖ້າຍັງບໍ່ໄດ້ Like ເພຈ໌ເຟສບຸກ “devcrown.com ຄວາມຮູ້ທັນສະໄໝ”, ກະລຸນາ Like ໃຫ້ແນ່ເດີ້, ຊິບໍ່ໄດ້ພາດຄວາມຮູ້ທີ່ດີດີ.

Facebook Comment
SHARE