ລັດວິສາຫະກິດການບິນລາວໄດ້ຢຸດການໃຫ້ບໍລິການຖ້ຽວບິນວຽງຈັນ – ອັດຕະປືແຕ່ເດືອນຕຸລາ 2016 ຜ່ານມາຍ້ອນເຫດຜົນຈໍານວນຜູ້ໂດຍສານມີໜ້ອຍ ແລະ ບໍ່ມີຄົນມາໃຊ້ບໍລິການ ຂະນະທີ່ ແຂວງອັດຕະປືມີປະຊາກອນພຽງແຕ່ 139.600 ກວ່າຄົນເທົ່ານັ້ນ.

ອໍານາດການປົກຄອງແຂວງອັດຕະປືໄດ້ເປີດເຜີຍອາທິດນີ້ວ່າຕາມຄວາມເປັນຈິງແລ້ວ ລັດວິສາຫະກິດການບິນລາວໄດ້ຕັດສິນໃຈຢຸດການໃຫ້ບໍລິການຖ້ຽວບິນລະຫວ່າງວຽງຈັນ  -ອັດຕະປື ແຕ່ເດືອນຕຸລາ 2016 ເປັນຕົ້ນມາ ແຕ່ລັດວິສາຫະກິດການບິນລາວບໍ່ໄດ້ມີການແຈ້ງການ ແລະ ປະກາດໃຫ້ປະຊາຊົນຮັບຊາບເທື່ອ.

ກ່ອນໜ້ານັ້ນເສັ້ນທາງການບິນລະຫວ່າງວຽງຈັນ-ອັດຕະປືມີທ່າອ່ຽງສົດໃສ ເນື່ອງຈາກວ່າຖ້ຽວບິນໄລຍະເດືອນສິງຫາທີ່ຜ່ານໄດ້ມີການບໍລິການ 2 ຖ້ຽວບິນຕໍ່ອາທິດມາເປັນ 3 ຖ້ຽວບິນຕໍ່ອາທິດ ແຕ່ຕ້ອງໄດ້ແວະປາກເຊ ແລະ ສືບຕໍ່ກັບວຽງຈັນ.

ແນວໃດກໍດີ ຕາມການລາຍງານຂອງເຈົ້າໜ້າທີ່ທ້ອງຖິ່ນໃຫ້ຮູ້ຕື່ມອີກວ່າ ແຂວງອັດຕະປືເປັນແຂວງໜຶ່ງ ທີ່ມີປະຊາກອນນ້ອຍເສດຖະກິດຕົ້ນຕໍແມ່ນພະລັງງານ-ບໍ່ແຮ່, ປູກໄມ້ອຸດສາຫະກໍາ ແລະ ກະສິກໍາ ເຊິ່ງມີຊາຍແດນຕິດກັບ ສສ.ຫວຽດນາມ ແລະ ກໍາປູເຈຍ ສະນັ້ນທ່າແຮງບົ່ມຊ້ອນການທ່ອງທ່ຽວ ແລະ ເສດຖະກິດອື່ນໆຍັງມີລະດັບທີ່ຕໍ່າ.

ໂຄງການກໍ່ສ້າງສະໜາມບິນອັດຕະປືໄດ້ເປີດນໍາໃຊ້ແຕ່ປີ 2015 ມູນຄ່າການກໍ່ສ້າງທັງໝົດ 289 ຕື້ກວ່າກີບ ຫລື ປະມານ 36,19 ລ້ານໂດລ່າ ເຊິ່ງເລີ່ມຈັດຕັ້ງປະຕິບັດມາແຕ່ວັນທີ 10 ພຶດສະພາ 2013.

ຂອບໃຈແຫຼ່ງຂ່າວຈາກ: ຂປລ

ຖ້າຍັງບໍ່ໄດ້ Like ເພຈ໌ເຟສບຸກ “devcrown.com ຄວາມຮູ້ທັນສະໄໝ“, ກະລຸນາ Like ໃຫ້ແນ່ເດີ້, ຊິບໍ່ໄດ້ພາດຂໍ້ມູນຂ່າວສານ, ຄວາມຮູ້ທີ່ດີດີ.

 

Facebook Comment
ອ່ານບົດຄວາມແລ້ວ ກົດໂຄສະນາລຸ່ມນີ້ທຸກເທື່ອໃຫ້ແດ່ເດີ້ ເປັນການສະໜັບສະໜູນຜູ້ຂຽນອີກທາງ ^^
loading...
SHARE