ລັດຖະບານໄດ້ເນັ້ນໃຫ້ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ເພີ່ມທະວີຄວາມ ເປັນເຈົ້າການຊຸກຍູ້ສົ່ງເສີມວຽກງານທ່ອງທ່ຽວທຸກຮູບແບບໃຫ້ແຂງແຮງກວ່າເກົ່າ, ພາຍຫລັງຕັ້ງເປົ້າປີນີ້ໃຫ້ສາມາດດຶງດູດນັກທ່ອງທ່ຽວເຂົ້າປະເທດໃຫ້ບັນລຸ 5,4 ລ້ານເທື່ອຄົນເພື່ອສ້າງລາຍຮັບໃຫ້ໄດ້ຫລາຍກວ່າ 875 ລ້ານໂດລ່າສະຫະລັດ (7,179,375,000,000 ກີບ).

ບັນຫາດັ່ງກ່າວໄດ້ກໍານົດຢູ່ໃນດໍາລັດຂອງນາຍົກລັດຖະມົນຕີ ວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາປະຈໍາປີ 2017 ໂດຍມອບໃຫ້ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ເອົາ

ໃຈໃສ່ພັດທະນາແຫລ່ງທ່ອງທ່ຽວປະເພດຕ່າງໆ ເຊັ່ນ: ທາງດ້ານທໍາມະຊາດ, ວັດທະນະທໍາ ແລະ ປະ ຫວັດສາດໃຫ້ດີຂຶ້ນ, ຂະນະດຽວກັນກໍເລັ່ງໃສ່ຊຸກຍູ້ສົ່ງເສີມການທ່ອງທ່ຽວແບບອະນຸລັກ ແລະ ປະຊາຊົນໄດ້ມີສ່ວນຮ່ວມຫລາຍຂຶ້ນ ເພື່ອຮັບປະກັນຄວາມຍືນຍົງ, ພ້ອມທັງເອົາໃຈໃສ່ປັບປຸງ ແລະ ພັດທະນາການບໍລິການການທ່ອງທ່ຽວໃຫ້ມີຄຸນນະພາບ, ໄດ້ມາດຕະຖານ ແລະ ຮັກສາໄດ້ເອກະລັກຂອງທ້ອງຖິ່ນ ແລະ ຂອງຊາດ. ນອກຈາກນີ້ກໍຕ້ອງສ້າງກິດຈະກໍາ ແລະ ເງື່ອນໄຂອໍານວຍຕ່າງໆໃນການດຶງດູດນັກທ່ອງທ່ຽວ ໃຫ້ເພີ່ມຂຶ້ນທັງປະລິມານ ແລະ ຄຸນນະພາບ ເພື່ອກະກຽມຮອງຮັບປີທ່ອງທ່ຽວລາວ 2018 ໃຫ້ໄດ້ຮັບຜົນສໍາເລັດດີ ກໍຄືສືບຕໍ່ຜັນຂະຫຍາຍແນວທາງນະໂຍບາຍຂອງພັກທີ່ກໍານົດເອົາການພັດທະນາການທ່ອງທ່ຽວໃຫ້ກາຍເປັນອຸດສະຫະກໍາທ່ອງທ່ຽວທີ່ມີເອກະລັກສະເພາະ ເພື່ອໃຫ້ກາຍເປັນຂະແໜງເສດຖະກິດທີ່ສໍາຄັນຂອງຊາດ ແລະ ປະກອບສ່ວນສໍາຄັນຂອງການທ່ອງທ່ຽວອາຊຽນ ແລະ ຂອງໂລກ.

ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໃຫ້ຮູ້ວ່າ: ຂະແໜງການທ່ອງທ່ຽວສາມາດຂັບເຄື່ອນການພັດທະນາໄປໃນຈັງຫວະຂະຫຍາຍຕໍ່ເນື່ອງ, ປັດຈຸບັນແຫລ່ງທ່ອງທ່ຽວໃນທົ່ວປະເທດມີ 1.957 ແຫ່ງ, ໃນນັ້ນທາງທໍາມະຊາດມີ 1.145 ແຫ່ງ, ວັດທະນະທໍາ 534 ແຫ່ງ ແລະ ປະຫວັດສາດ 278 ແຫ່ງ, ອັນພົ້ນເດັ່ນນັບແຕ່ເມືອງຫລວງພະບາງ ແລະ ວັດພູຈໍາປາສັກໄດ້ຖືກອົງການອຸຍແນສໂກ (UNESCO) ຮັບເຂົ້າເປັນມໍລະດົກໂລກ ກໍໄດ້ກາຍເປັນທ່າແຮງສໍາຄັນໃນດຶງດູດນັກທ່ອງທ່ຽວເຂົ້າມາຢ້ຽມຢາມປະເທດເຮົາເປັນຈໍານວນຫລາຍລ້ານຄົນໃນ ແຕ່ລະປີ, ສາມາດສ້າງລາຍຮັບບໍ່ໜ້ອຍໃຫ້ແກ່ເສດຖະກິດຂອງຊາດ ແລະ ໄດ້ນໍາເອົາຜົນປະໂຫຍດມາສູ່ປະຊາຊົນບັນດາເຜົ່ານັບມື້ຫລາຍຂຶ້ນ.

 

ຂອບໃຈແຫຼ່ງຂ່າວຈາກ: laophatthananews

ຖ້າຍັງບໍ່ໄດ້ Like ເພຈ໌ເຟສບຸກ “devcrown.com ຄວາມຮູ້ທັນສະໄໝ“, ກະລຸນາ Like ໃຫ້ແນ່ເດີ້, ຊິບໍ່ໄດ້ພາດຂໍ້ມູນຂ່າວສານ, ຄວາມຮູ້ທີ່ດີດີ.

 

Facebook Comment
ອ່ານບົດຄວາມແລ້ວ ກົດໂຄສະນາລຸ່ມນີ້ທຸກເທື່ອໃຫ້ແດ່ເດີ້ ເປັນການສະໜັບສະໜູນຜູ້ຂຽນອີກທາງ ^^
loading...
SHARE