ນັກລົງທຶນ ສປ ຈີນ ໃຫ້ຄວາມສົນໃຈ ຢາກເຂົ້າມາລົງທຶນ ພັດທະນາແຫລ່ງທ່ອງທ່ຽວຢູ່ແຂວງ ອຸດົມໄຊ ພາຍຫລັງພົບວ່າແຂວງດັ່ງກ່າວ ມີທ່າແຮງບົ່ມຊ້ອນ ກ່ຽວກັບແຫລ່ງທ່ອງທ່ຽວ ຫລາຍກວ່າ 100 ແຫ່ງ ທີ່ໄດ້ຖືກຄົ້ນພົບ ຂະນະທີ່ປີ 2016 ຜ່ານມານີ້ ແຂວງອຸດົມໄຊ ສາມາດດຶງດູດນັກທ່ອງທ່ຽວ 50 ພັນຄົນ ແລະ ສ້າງລາຍຮັບ ໄດ້ປະມານ 4 ລ້ານກວ່າໂດລາສະຫະລັດ.

ທ່ານ ອ່ອນແກ້ວ ອຸ່ນອາລົມ ຫົວໜ້າພະແນກ ແຜນການ ແລະ ການລົງທຶນ ແຂວງອຸດົມໄຊ ໃຫ້ສໍາພາດຕໍ່ສື່ມວນຊົນ ເມື່ອບໍ່ດົນຜ່ານມາວ່າ: ປັດຈຸບັນ ມີແຫລ່ງທ່ອງທ່ຽວຫລາຍໆແຫ່ງ ຢູ່ແຂວງອຸດົມໄຊ ທີ່ມີນັກລົງທຶນ ຫລາຍປະເທດສົນໃຈ ສະເໜີຢາກເຂົ້າມາພັດທະນາ ໂດຍສະເພາະແມ່ນ ສປ ຈີນ ສະເໜີຢາກເຂົ້າມາ ພັດທະນາແຫລ່ງທ່ອງທ່ຽວ ຕາດຕະແລ ຢູ່ເມືອງຮຸນ ເຊິ່ງເປັນນໍ້າຕົກຕາດ ທາງທໍາມະຊາດ 7 ຊັ້ນ ອ້ອມຮອບດ້ວຍປ່າດົງດິບ ພ້ອມນີ້ ກໍມີທັງຕາດໃຫຍ່ ແລະ ຕາດນ້ອຍຢັ່ງຢາຍ ໄປຕາມສາຍນໍ້າຍາວປະມານ 600 ແມັດ ຫ່າງຈາກເທດສະບານເມືອງ ໄປປະມານ 20 ກິໂລແມັດ. ນອກນັ້ນ ກໍມີແຫລ່ງທ່ອງທ່ຽວ ຖໍ້າຈອມອອງ ເມືອງໄຊ ທີ່ມີຄວາມຍາວປະມານ 16 ກິໂລແມັດ ຄວາມກວ້າງຂອງຖໍ້າ 15-50 ແມັດ ແລະ ສູງ 25-100 ແມັດ ຢູ່ຫ່າງຈາກ ເທດສະບານເມືອງໄປ 45 ກິໂລແມັດ. (ປັດຈຸບັນ ຍັງບໍ່ໄດ້ມີການພັດທະນາ).

ທ່ານຍັງກ່າວຕື່ມວ່າ: ໃນປີ 2017 ຈະເລັ່ງພັດທະນາ ເມືອງປາກແບງ ໃຫ້ເປັນປະຕູທາງເຂົ້າ ຂອງນັກທ່ອງທ່ຽວ ສາມາດລ່ອງເຮືອມາຈາກ ແຂວງບໍ່ແກ້ວ ສະເລ່ຍ 100 ຄົນ/ມື້, ປັດຈຸບັນນີ້ ນັກທ່ອງທ່ຽວເຂົ້າມາທາງ ເມືອງປາກແບງຫລາຍ ແລະ ຈະສືບຕໍ່ ຈັດເປັນໂປແກຣມທ່ອງທ່ຽວ ຫາແຫລ່ງທ່ອງທ່ຽວອື່ນໆ ເປັນຕົ້ນ: ນໍ້າກັດຍໍລະປ່າ, ໄປໄຫວ້ພະເຈົ້າສິງຄໍາ ແລະ ສະຖານທີ່ທ່ອງທ່ຽວ ທີ່ມີຊື່ສຽງຢູ່ໃນ ແຂວງອຸດົມໄຊ.

 

ຂອບໃຈແຫຼ່ງຂ່າວຈາກ: ຂປລ

ຖ້າຍັງບໍ່ໄດ້ Like ເພຈ໌ເຟສບຸກ “devcrown.com ຄວາມຮູ້ທັນສະໄໝ“, ກະລຸນາ Like ໃຫ້ແນ່ເດີ້, ຊິບໍ່ໄດ້ພາດຂໍ້ມູນຂ່າວສານ, ຄວາມຮູ້ທີ່ດີດີ.

 

Facebook Comment

LEAVE A REPLY